Атыраудың бұрынғы әкімі ұсталды

9 қарашада жер телімдерін заңсыз бөлуге қатысты қозғалған қылмыстық іс аясында Атырау қаласының бұрынғы әкімі Қайрат Оразбаев ұсталды. Бұл туралы облыстық прокуратура хабарлады деп жазады KAZ.NUR.KZ.

Ведомство мәліметінше, Атырау облысының прокуратурасы алаяқтық белгілері бойынша Атырау қаласы әкімдігінің лауазымды тұлғаларына қатысты сотқа дейінгі тергеп-тексеру жүргізуде.

2020-2022 жылдар аралығында әкімдіктің лауазымды тұлғалары жеке тұрғын үй құрылыстары үшін рекреациялық аймақтарға (жасыл желек аймақтары, саябақтар, скверлер, жағалаулар және т.б.) жататын жер учаскелерін заңсыз бергені анықталған.

"9 қарашада Қылмыстық кодекстің 190-бабы 4-бөлігі 2-тармағында көзделген қылмыстық құқықбұзушылықты жасады деген күдікпен Атырау қаласының экс-әкімі Оразбаев ұсталды.

Қылмыстық-процестік кодекстің 201-бабының талаптарына сәйкес, өзге ақпарат жария етуге жатпайды", - делінген хабарламада.

Прокуратура тергеу амалдары жалғасып жатқанын атап өтті.

Мәтіннен қате тапсаңыз, бізге жазыңыз