Алматыда жаздық дөңгелекпен жүрген жүргізушілерге айыппұл салынады

Алматы қаласының жүргізушілері 1 желтоқсан мен 1 наурыз аралығында қысқы дөңгелекпен жүруге міндетті. Алматы қаласы полиция департаментінің ресми өкілі Салтанат Әзірбек жаздық дөңгелекпен жүрген көлік жүргізушісі 10 айлық есептік көрсеткішке дейін айыппұл төлеуі мүмкін екенін мәлім етті, деп хабарлайды Алматы арнасы.

Қазақстан Республикасы әкімшілік кодексінің 590-бабының 5-бөлігі бойынша қысқы уақытта жазғы дөңгелекпен жүрген жүргізуші анықталған жағдайда полиция қызметкерлері айыппұл салуға құқылы.

Мұндай заңбұзушылық үшін айыппұлдың ең төменгі мөлшері 5 АЕК құрайды. Егер бір жыл ішінде жүргізуші осындай құқық бұзушылықты қайта жасаса, онда айыппұл 10 АЕК-ке дейін артады.

"Қыс таяп қалды. Сондықтан 1 желтоқсаннан 1 наурызға дейін біздің барлық автокөлігіміз қысқы резеңкеге ауысуы керек. Бұл қауіпсіздік талаптары. Өйткені, ірі мегаполисте алғашқы жауын-шашын басталғаннан кейін хаос басталады. Оның себебі - жүргізушілердің қыс мезгіліне дайын еместігінде", - дейді Салтанат Әзірбек.

Сонымен қатар Алматы қаласы полиция департаментінің ресми өкілі Салтанат Әзірбек жүргізушілерді алдын ала қамданып, көлікті қыс кезіне ертерек дайындауға шақырды. Полицейлер бұл бағытта 1 қарашадан бастап профилактикалық жұмыстарды бастаған.