Шымкентте заңсыз діни дәріс берумен айналысқан келіншек жауапқа тартылды

Шымкентте лицензиясы болмаса да, діни дәріс берумен айналысқан 30 жастағы келіншек жауапқа тартылды, деп хабарлайды Polisia.kz ақпараттық медиа-порталы.

Медиа-портал мәліметінше, экстремизмге қарсы іс-қимыл басқармасының қызметкерлері жедел іс-шаралар жүргізу барысында 30 жастағы қала тұрғынын анықтады.

Келіншек діни ілімі мен заңды лицензиясының жоғына қарамастан, мегаполистегі оқу орталықтарының бірінде араб тілі және құранды толық үйрету бойынша дәріс берумен айналысқан.

"Тәртіп сақшылары бұл жайтқа қатысты ӘҚБтК-нің 490-бабы 1-бөлігі бойынша әкімшілік хаттама толтырып, азаматшамен профилактикалық әңгіме жүргізді", - деп жазылған басылымда.

Сот шешімімен заң бұзушыға 40 АЕК көлемінде, яғни 138 мың теңге айыппұл салынған.