СІМ: Газа секторындағы қазақстандықтар елге оралды

Бүгін, қарашаның 17-сі Газа секторындағы қазақстандықтар мен отбасы мүшелері Алматыға ұшып келді, деп хабарлайды Сыртқы істер министрлігі Telegram-дағы ресми жаңалықтар арнасы.

СІМ ақпараты бойынша, президент Қасым-Жомарт Тоқаевтың тапсырмасына сәйкес, Сыртқы істер министрлігі Газа секторындағы қазақстандықтарды эвакуациялауды жүзеге асырды.

Бүгін арнайы эвакуациялық бортпен 99 жолаушы – Қазақстан азаматтары мен олардың отбасы мүшелері Алматы қаласына аман-есен ұшып келді.

Әуежайдағы барлық міндетті рәсімдерден өткеннен кейін эвакуацияланған азаматтарға уақытша баспана беріліп, оларға қажетті құқықтық, медициналық және өзге де көмек көрсетілуде.

Қазақстанның Израильдегі, Иорданиядағы және Мысырдағы елшіліктері осы елдердегі уәкілетті органдарымен және халықаралық ұйымдармен бірлескен үйлесімді жұмысының нәтижесінде шетелдегі қазақстандықтар аман-есен эвакуацияланып, елге оралды.

Таяу Шығыс өңірінің сыртқы саяси ведомстволарының басшылығымен келіссөздер қорытындысы бойынша, СІМ азаматтарымызды қауіпсіз әрі еш кедергісіз Газа секторынан шығарып ала алған.

Қазақстандық дипломаттар қақтығыс аймағында қалып қойған Қазақстан азаматтарына көмек көрсету және эвакуациялық іс-шараларды ұйымдастыру жөніндегі жұмысты жалғастырады.