Синоптиктер биыл қыс осыдан 22 жыл бұрынғыдай болатынын айтты

Синоптиктердің болжамынша, биыл күз мезгілі кейінгі жылдармен салыстырғанда әлдеқайда жылы болды. Мамандардың КТК телеарнасына берген сұхбатына сүйенсек, алдағы қыс 2001-2002 жылдардағы қыс мезгіліне ұқсауы мүмкін.

Метеорологтардың мәліметінше, алдағы күндері республика бойынша екпіні секундына 28 метрге жететін жел соғады. Солтүстікте бұрқасын, көктайғақ күтіледі.

Мамандардың айтуынша, желтоқсан, қаңтар және ақпан айларындағы ауа райына Атлант мұхиты аймақтарынан ылғалды ауа массалары әсер етеді. Сондықтан қазақстандықтар үшін 20 жылдан бері болмаған жылы қыс болуы ықтимал. Дегенмен сарапшылар мұны аномалия деп санамайды.

"2023-2024 жылдардың қысы 2001-2002 жылдардағы қыс сценарийіне ұқсас болмақ, яғни жылы және жауын-шашын көп болады. Алдағы қыста Қазақстанда температуралық фон климаттық нормадан 1-2 градус жоғары болады деп күтіледі.

Көпжылдық мәліметтер бойынша қыс жылы болған жылдары орташа температура нормадан 4-10 градусқа жоғары болған", - деді "Қазгидромет" РМК баспасөз хатшысы Алина Исмағұлова.

Синоптиктер Қазақстанда жаңа жылдың басында қар жиі жауатынын болжады. Еліміздің солтүстігі, шығысы мен орталығында қатты аяз болуы мүмкін. Термометр -17 градусқа дейін төмендейді. Бұл айларда оңтүстік өңірлерде ауа райы нөлден жоғары болады.

Метеорологтар биыл көктем де жылы болатынын айтты.

Дереккөз: КТК

Мәтіннен қате тапсаңыз, бізге жазыңыз