ТЖМ қазақстандықтарды сабыр сақтап, үрейге бой алдырмауға шақырды

Төтенше жағдайлар министрлігі дабыл жүйесі тексерілетінін хабарлады. Осыған байланысты ведомство азаматтарды сабыр сақтап, үрейге бой алдырмауға шақырды, деп хабарлайды ТЖМ ресми сайтында.

Бейсенбі, 23 қарашада сағат 12:55-те республика бойынша электр сиреналарын, сиреналық-сөйлеу құрылғыларын іске қосып, теле-радио хабарларын таратуды тоқтата отырып, құлақтандыру жүйесін тексеру жүргізіледі. Осы іс-шара "Қыс-2023" республикалық командалық-штабтық оқу-жаттығуы аясында өткізіледі.

Ведомство мәліметінше, төтенше жағдай болған кезде халықтың назарын аудару үшін электр сиреналар, сиреналық-сөйлеу құрылғылары немесе басқа да дабыл құралдары қосылады, ол "Баршаның назарына!" бірыңғай құлақтандыру дабылын білдіреді.

Бұл дабылды естіген кезде тұрғындар орын алған жағдай кезінде әрекет ету туралы мәліметтер мен нұсқаулар алу үшін қолжетімді ақпарат қабылдау құралдарын (телеарналар, радиолар, интернет сайттар, әлеуметтік желілер, мобильді құрылғыларға арналған қосымшалар және т.б.) дереу қосуы керек.

Төтенше жағдайлар министрлігі азаматтарды сабыр сақтап, үрейге бой алдырмауға кеңес береді.

Мәтіннен қате тапсаңыз, бізге жазыңыз