Желіде бұрынғы депутат Бірғаным Әйтімованың атынан фейк жарнама тарады

Facebook-те парламент сенатының депутаты болған Бірғаным Әйтімова "аз ақша жұмсап, 550 мың теңге табуға" мүмкіндік беретін жоба ашқаны туралы айтқан видео жарияланған. Бұл фейк деп, хабарлайды Stopfake.kz.

Ақпараттың шынайылығын тексеретін сайттың мәліметінше, желіде тараған жарнамадағы видеода төрт жыл бұрын "Хабар 24" телеарнасында шыққан "История в лицах" бағдарламасынан үзінді қолданылған.

Монтаждалған видеода бойжеткен бір "жобаға" қатысқанын және табыс тапқанын айтады.

Сайттың жазуынша, шын мәнінде Бірғаным Әйтімова сол бағдарламадағы сұхбатында жұмысы және Қазақстан тәуелсіздігінің қалыптасу жылдары туралы баяндаған.

"Ол жеке инвестициялық жоба туралы айтқан жоқ. Қазіргі кезде әлеуметтік желілерде таралып жатқан бейнероликте бағдарламаның кадрлары пайдаланылған. Мұқият қарасаңыз, дыбыс пен артикуляцияның сәйкес келмейтінін байқауға болады", - деп жазады сайт.

Сондай-ақ сайт мамандары ролкитегі қыздың сөздері де күмән тудыратынын байқаған. Мысаалы, ол алдын ала дайындалған мәтінді оқып отырып, Бірғаным Әйтімованың тегін қате айтқан, атын "Гүлнара" деп атаған.

"Демек таралған видеоға сенбеген жөн. Бұл – алаяқтардың әрекеті", - деді сайт өкілдері.

Мәтіннен қате тапсаңыз, бізге жазыңыз