Ұлытау облысында ауруханада жұмыс істемеген адамдарға 5,1 млн теңге заңсыз аударылған

Ұлытау облысында сенiп тапсырылған бөтен мүлiктi иемденiп алу немесе талан-таражға салу бойынша айыпталған Жәйрем кенті ауруханасының бухгалтерлеріне сот үкімі шықты. Бұл туралы Ұлытау облысының прокуратурасы ресми сайтында хабарлайды.

Ведомство мәліметінше, Жәйрем кенті медициналық мекемесінің Б. және T. бухгалтерлері 2021-2022 жылдары ауруханада іс жүзінде жұмыс істемеген адамдарға 5,1 млн теңгені заңсыз аударған.

"Әрі қарай жымқырылған қаражатты аталған бухгалтерлер өз пайдаларына иемденген. Бұл факт бойынша прокуратура Қылмыстық кодекстің 189-бабы (Сенiп тапсырылған бөтен мүлiктi иемденiп алу немесе талан-таражға салу) бойынша сотқа дейінгі тергеп-тексеруді бастады", - делінген хабарламада.

Бүгінде бұл іс бойынша сот үкімі шығып, аурухана бухгалтерлері кінәлі деп танылып, оларға бас бостандығын шектеу жазасы белгіленген (2 жыл және 3 жыл 6 ай мерзімге).

Сот үкімі заңды күшіне енбеген.

Ұлытау облыстық прокуратурасының өкілдері қазіргі уақытта атқарушылық іс жүргізу қозғалып, мемлекетке келтірілген залалды өтеу бойынша шаралар қабылданып жатқанын атап өтті.