Маңғыстау облысы 1 желтоқсаннан бастап елорда уақытына ауыса ма

Ақтау тұрғындары бір-біріне мессенджерлер мен әлеуметтік желілерде 2023 жылғы 1 желтоқсаннан бастап өңір уақыты елордалық уақытқа, яғни бір сағат алға жылжитыны туралы хабарлама таратуда. Облыстық қоғамдық коммуникация орталығы Facebook-тегі ресми парақшасында әзірге сағат ауыспағанын, нақты шешімі алдағы уақытта белгілі болатынын мәлімдеді.

Облыстық қоғамдық коммуникация орталығының мәліметінше, Маңғыстау облыстық ішкі саясат басқармасы Қазақстан Республикасының Экология және табиғи ресурстар министрлігіне сілтеме жасай отырып, қазіргі уақытта бұл мәселе бойынша шешім қабылданбағанын хабарлады.

"Аталған мәселенің шешімі егжей-тегжейлі зерделегеннен кейін, сондай-ақ жұртшылықпен кеңінен талқыланғаннан кейін қабылданады", - деді Маңғыстау облыстық ішкі саясат басқармасы басшысының орынбасары Ақай Мусалиев.

Мәтіннен қате тапсаңыз, бізге жазыңыз