Алматыда өртенген үйден бір отбасының бес адамы құтқарылды

Алматыда желтоқсанның 11-і тұрғын үйлердің бірінен өрт шықты. Өртсөндірушілер бес адамнан тұратын отбасыны құтқарды, деп хабарлайды ТЖМ ресми сайты.

Ведомство ақпараты бойынша, биыл желтоқсанның 11-і сағат 03:03-те Алматы қаласы ТЖД пультіне Наурызбай ауданы Таусамалы ықшамауданында орналасқан Сәдуақасұлы көшесі 125 үй мекенжайынан өрт шыққаны туралы хабарлама келіп түскен.

"Аға инженер, кезекші ауысымның басшысы, азаматтық қорғау капитаны Ж. Әкетай өтініш берушімен байланысып, жеке тұрғын үйдің ашық отпен жанып жатқаны туралы ақпарат алды. Өрт орнына келгеннен кейін өрт сөндіру басшысы үйде адамдардың болуына барлау жүргізу, сондай-ақ өртті сөндіруге оқпандарды бере отырып, өртке қарсы іс-әрекет өрістету туралы бұйрық берді.

Барлау жүргізу барысында бөлімше командирі Ш. Таипов, аға өрт сөндіруші Ж. Мамыт адамдарды тапты, олар шок күйінде болған", – делінген ведомство хабарламасында.

ТЖ кезінде ер адам, әйел, жас жігіт пен екі қыз құтқарылған. Өрт 03:24-те оқшауланды, ал 3:40-та толық сөндірілген.

Сондай-ақ, ведомство өкілдерінің дерегінше, үйлесімді жедел іс-қимылдардың нәтижесінде өртсөндірушілер тұрғын үйдің бөлмелеріне оттың таралуын тоқтатып, өртті сөндіру жұмыстары кезінде су шашу салдарынан туындаған материалдық залал барынша азайтылған.