Көктайғақ: Жамбыл облысында жолдар қайта жабылды

Жамбыл облысының жолдарында жаңбыр салдарынан қатты көктайғақ пайда болды. Нәтижесінде өңірде автокөлік қозғалысына қайта шектеу енгізілді, деп хабарлайды KAZ.NUR.KZ көлік министрлігінің баспасөз қызметіне сілтеме жасап.

15 желтоқсанда сағат 23-30-да жолдарды қардан тазарту аяқталғаннан кейін Жамбыл, Түркістан және Алматы облыстарындағы бірқатар учаскелерде қозғалыс жанданған болатын. Тас жолдарда жиналған автокөліктер Алматы және Шымкент қалалары бағытында жүруді жалғастырды.

Алайда, 16 желтоқсанда сағат 4:00-де Жамбыл облысының аумағында төмен температурада нөсер жаңбыр жауып, қатты көктайғақтың пайда болуына әкеліп соқты. Сол себепті аталған жолда көліктің барлық түрлері үшін қозғалыс қайтадан шектелді.

Осылайша, ағымдағы сәтте ауа-райының нашарлауына байланысты (төмен температура, нөсер жауын, боран) 4 облыста: Алматы, Жамбыл және Түркістан облыстарында, сондай-ақ Жетісу өңірінде республикалық маңызы бар автожолдардың 7 учаскесінде көлік қозғалысына шектеу енгізілді.

Жабық учаскелер туралы толық ақпаратты жақын арада көлік министрлігі ұсынады.