Таразда қаңтар оқиғасынан кейін қалпына келтіру жұмыстарына 6 млрд теңге жұмсалған

Таразда қаңтар оқиғасы кезінде бірнеше мемлекеттік мекеме мен ондаған шағын және орта бизнес нысанына зақым келген. Оларды қалпына келтіруге 6 млрд теңге жұмсалғаны белгілі болды, деп хабарлайды 24KZ.

Қаңтар оқиғасы кезінде мамандандырылған күзет қызметі басқармасының басшысы қызметін атқарған Бауыржан Үдергеновтің айтуынша, облыс әкімдігіне басып кіру әрекеті 4 қаңтарда босталған. Режимдік нысанды қорғай алдық, дейді ол, бірақ келесі күні полиция күштері жеткіліксіз болған.

"Біз өзіміз ғана қалдық, 100 адам, нысанды соңына дейін бермей отырдық. Бірақ бізге қарай Молотов коктейльдерін лақтыра бастағанда шыдай алмадық, қызметкерлердің бәрі әкімдіктің артқы ауласына шықтық, онда 500-ге жуық адам бізді күтіп тұрды. Бәріміз әртүрлі дене жарақатын алдық", - деп еске алды сол күндерді Үдергенов.

Мародерлер қолына түскеннің бәрін ғимараттан алып шығып, содан кейін оны өртеп жіберді, дейді Махметғали Сарыбеков.

Қаңтардағы тәртіпсіздіктер кезінде ол облыстық мәслихаттың хатшысы болып жұмыс істеген, аймақ басшыларымен бірге ашулы топты сабырға шақыруға тырысыпты. Бірақ жиналғандар бұған көнбеген. Жаппай тәртіпсіздік салдарынан 7 мемлекеттік нысан бүлінген. Оларды қалпына келтіруге айтарлықтай қаражат жұмсалғаны белгілі болды.

"Бастапқыда бағалау жұмыстары жүргізілді, яғни 9 миллиард теңге, бірақ кейін бұл сома 6 миллиард теңгеге дейін түзетілді. Бірақ бұл өте үлкен сома. Ол негізінен үкіметтің резервінен бөлінді. Қалпына келтіру жұмыстары түгелдей жүргізілді. Бірақ, әрине, бұл сомаға мектептер салуға, балабақшалар, ауруханалар, емханалар салуға және қосымша тұрғын үй салуға болар еді", - дейді педагогика ғылымдарының докторы, профессор, ҚР еңбек сіңірген қайраткері Махметғали Сарыбеков.

Облыс орталығында 30 шағын және орта бизнес нысаны бүлінген. Олардың иелеріне мемлекеттік бюджеттен шамамен 100 миллион теңге өтемақы төленген. Қаңтардағы тәртіпсіздіктер кезінде бір ғана Тараздың өзінде 15 адам мерт болған.