"Желдің екпіні 25-30 м/с-қа дейін жетті": СҚО-да боран салдарынан 181 елді мекен жарықсыз қалған
Опубликовано:
Солтүстік Қазақстан облысында мамандар 26 желтоқсанда болған боранның салдарымен күресіп жатыр. Дауыл кезінде 13 ауданның 181 елді мекені электр жарығынан ажырап қалған, деп хабарлайды Kazinform.
СҚО энергетика және тұрғын үй-коммуналдық шаруашылығы басқармасы басшысының міндетін атқарушы Владислав Лукиннің айтуынша, электр сымдарының үзілуінен, шағын станцияларда сымдардың тұйықталуынан 14590 абонент жарықссыз қалған.
"Облыс аумағында желдің екпіні 25-30 м/с-қа дейін жетті. Қар аралас жаңбыр жауды. Салдарынан 181 елді мекен жарықсыз қалды. Өңірде осындай оқыс оқиғада тиісті әрекет етіп, барлық қызметтің жұмысын үйлестіретін штаб бар. Бірінші кезекте әлеуметтік нысандар – аудандық ауруханалар, мектептер, балалар үйлері, орталық қазандықтар назарға алынды. Олар бірден қосымша жарық беру көздеріне қосылды", - дейді Владислав Лукин.
Қазіргі уақытта үзілген электр желілерін анықтап, қалыпқа келтірумен "Севказэнерго" АҚ 55 апаттық-жөндеу бригадасы, сонша техника және "Көкшетау-Энерго" ЖШС 37 бригадасы мен 140 техникасы айналысып жатыр.
Сағат 15.00-дегі мәлімет бойынша әзірге 92 елді мекеннің 5079 абоненті жарықсыз отыр.
Мақаланың түпнұсқасы: https://kaz.nur.kz/society/2052984-zeldin-ekpini-25-30-ms-deiin-zetti-sqo-da-boran-saldarynan-181-eldi-meken-zaryqsyz-qalgan/