АМӨЗ серіктесіне 2 млрд теңгеге жуық айыппұл салынды

Атырау облысында "Сұйытылған мұнай газын сақтау паркі" ЖШС-ге Joint Technologies ЖШС-нің 50 пайыз үлесін сатып алу-сату шарты бойынша ерекше талаптарды бұзғаны үшін 2 млрд жуық айыппұл салынды, деп хабарлайды Атырау облысы прокураторасының ресми сайты.

Ведомство ақпаратына сүйенсек, облыстық прокуратура өңір экономикасын демонополизациялау бойынша дәйекті жұмыс жүргізіп жатыр.

"Joint Technologies ЖШС-нен "Сұйытылған мұнай газын сақтау паркі" ЖШС үлесінің 50 пайызын сатып алу-сату шарты бойынша ерекше талаптарды бұзғаны үшін бюджетке 1,7 млрд теңге мөлшерінде тұрақсыздық айыбы өндірілді", – делінген хабарламада.

Сондай-ақ парк сот қаулысымен бәсекелестікті қорғауды бұзғаны үшін Әкімшілік құқық бұзушылық туралы кодекстің 159-бабы 3-1-бөлігі бойынша әкімшілік жауаптылыққа тартылды. "Сұйытылған мұнай газын сақтау паркі" ЖШС-не 324 млн теңге көлемінде айыппұл салынды.

Атырау облысының прокураторасы өкілдері бұған дейін прокурорлық тексеру нәтижелері бойынша жалпы сомасы 5,7 млрд теңгеге 50 пайыз үлес түріндегі мүлік мемлекетке қайтарылғанын еске салды.