Өскеменде "Крик" фильміндегі бетпердемен жұмысқа келген автобус жүргізушісі жұмыстан қуылды (видео)

Өскеменде автобус жүргізушісі қорқынышты фильмдегі бетпердемен қоғамдық көлікті басқарған. Ер адам жұмыстан шығарылды, деп хабарлайды Yknews.kz сайтына сілтеме жасаған KAZ.NUR.KZ.

Жергілікті басылым мәліметіне сүйенсек, оқиға куәгерлері "Крик" фильміндегі бетпердені киіп, автобусты басқарып бара жатқан жүргізушінің видеосын әлеуметтік желіге таратқан.

Жүргізушінің әрекетіне қатысты тұрғындардың пікірі екіге жарылды. Біреулер балалар қоғамдық көлік жүргізушілерінен қорқуы мүмкін деп жазды. Басқалары мұндай бетперде киген жүргізуші басқа жол қозғалысына қатысушылардың назарын аударуы мүмкін екенін айтты. Кейбір желі қолданушылары жүргізушінің әзіліне қолдау білдірді.

Алайда, автобус жүргізушісі жұмыс істейтін компания мұндай әзілді бағаламады.

"Тасымалдаушының айтуынша, аталмыш жүргізуші әдепсіз әрекеті үшін жұмыстан босатылған", - деп хабарлады "Өскемен жолаушылар тасымалын басқару орталығы" ЖШС.

ШҚО ІІД баспасөз қызметі автобус жүргізушісі жол ережесін бұзбағанын, сондықтан оны жауапкершілікке тартпайтынын хабарлады.