Kazakh Tourism және Яндекс Қазақстан туризм саласындағы ұзақ мерзімді серіктестік орнатпақ

Kazakh Tourism және Яндекс Қазақстан туризмді дамыту мақсатында ұзақ мерзімді серіктестік орнату туралы уағдаласты. Ынтымақтастықтың бірінші кезеңі шеңберінде Яндекс карталарында Kazakh Tourism Алматы және Астана қалаларының тұрғындары мен қонақтарына баруды ұсынатын 18 эксклюзивті орындар топтамасы пайда болды.

"Қазақстанның цифрлық платформаларға қатысуын арттыру – ұлттық компанияның басты міндеттерінің бірі. Сондықтан технологиялық компаниямен стратегиялық серіктестік және Қазақстанның танымал жерлері туралы ақпаратты ең танымал картографиялық сервистердің бірінде орналастыру орынды және өзекті болып табылады", – дейді ҚР Туризм және спорт вице-министрі Ержан Еркінбаев.

Әр топтама белгілі бір тақырыпқа бағытталған, мысалы: дәстүрлі мейрамханалар, таңғы ас ұсынатын кафелер, панорамалық көріністері бар орындар, достармен кездесуге арналған орындар, жергілікті брендтер дүкендері және түнгі өмір шоғырланған локациялар.

Топтамалар Almaty Tourism Bureau және Visit Astana деректеріне негізделген және қазақ, ағылшын, орыс тілдерінде қолжетімді. Сондай-ақ топтамалар тізімі жыл бойы толықтырылып отырады.

Оларды көру үшін "Яндекс Карты" қосымшасына кіріп, іздеу жолағын басып, "Топтамалар" санатын ашсаңыз болғаны. Қосымшадағы өзіңіз қалаған жерге бару үшін жаяу, көлікпен немесе қоғамдық көлікпен жетуге болатын бағдар құруға болады.

"Яндекс Карты" қосымшасын Google Play Market немесе App Store дүкендерінен жүктеп алуға болады.