Биыл университетке түсу үшін шекті балл өзгере ме: Ұлттық тестілеу орталығы жауап берді

Биыл Қазақстанның жоғары оқу орындарына түсу үшін шекті балл өзгеріссіз қалды. Бұл туралы Ұлттық тестілеу орталығы Facebook парақшасында хабарлады.

Орталық ақпаратынша, биыл ЖОО түсу үшін шекті балл өткен жылмен бірдей, яғни кемінде 50 балл және ұлттық жоғары оқу орындарына түсу үшін кемінде 65 балл болып қалды.

Алайда оқуға түсу үшін 50-ден астам балл жинау қажет дайындық бағыттары бар. Ең жоғары шекті балл – кемінде 75 балл "Құқық" және "Педагогикалық ғылымдар" білім беру бағдарламаларына түсу үшін бекітілген.

Ал "Денсаулық сақтау және әлеуметтік қамтамасыз ету (медицина)" бағытын таңдаған талапкерлер ҰБТ-да кемінде 70 балл жинауы тиіс. Одан бөлек, ұлттық жоғары оқу орындарына "Ауыл шаруашылығы және биоресурстар" және "Ветеринария" мамандығына түскісі келетіндерге кемінде 60 балл жинауы қажет.

"Талапкерлер әр жоғары оқу орны өзінің шекті балын қоя алатындығын да ескеру керек. Бұл құқық оларға төрт жыл бұрын академиялық еркіндік негізінде берілген еді. Мысалы, 80 балл жинаған талапкер математика мұғалімі мамандығына ұлттық ЖОО-ға түскісі келеді. Баршаға мәлім, "Педагогикалық ғылымдарға" шекті балл кемінде 75 балл, ал ұлттық оқу орындарына – кемінде 65 балл. Оқушының жинаған ұпайы жетіп тұр.

Алайда таңдалған университетте оқушының оқығысы келген мамандыққа шекті балл 85-тен басталады. Демек, оқушыға шекті балын 80-ге дейін белгілеген университетті іздеу керек", - деді ҒЖБМ Ұлттық тестілеу орталығының директоры Руслан Емелбаев.

Емелбаев жоғары оқу орындарының шекті балы жақын арада Ұлттық тестілеу орталығының сайтында жарияланатынын хабарлады.