Жамбыл облысында алма көшеттеріне бөлінген 210 млн теңгеге жуық субсидия ұрланған

Жамбыл обылсында квазимемлекеттік мекеменің бұрынғы басқарма төрағасы мен оның орынбасары ресми құжаттарға көрінеу жалған мәліметтер енгізу арқылы нақты сатылмаған алма көшеттері үшін субсидия алғаны белгілі болды. Бұл туралы KAZ.NUR.KZ Жамбыл облысының прокуратурасына сілтеме жасап хабарлайды.

Жамбыл облысының прокуратурасы агроөнеркәсіптік кешенді дамытуға бөлінген бюджет қаражаттарын жымқыру дерегін анықтаған.

"Меркі" тәжірибелік шаруашылық" ЖШС квазимемлекеттік мекемесінің бұрынғы басқарма төрағасы және оның орынбасары ресми құжаттарға көрінеу жалған мәліметтер енгізу арқылы нақты сатылмаған алма көшеттері үшін 209,9 млн теңге субсидия алған", - делінген хабарда.

Аталған факт бойынша Меркі ауданының прокуратурасы Қылмыстық кодекстің 190-бабы, 4-бөлігі, 2-тармақшасымен (алаяқтық) қылмыстық іс тіркеп, оны тергеп-тексеру облыс прокуратурасымен бірге жүргізіліп жатыр.

Сот бір күдіктіге қатысты күзетпен ұстау бұлтартпау шарасын қолдануға санкция берсе, екіншісіне қатысты үйқамақ шарасы қолданылды.

Құзырлы орган мәліметінше, сотқа дейінгі тергеп-тексеру жалғасуда, Қылмыстық-процестік кодекстің 201-бабына сәйкес тергеу мүддесі үшін өзге ақпараттар жариялауға жатпайды.