ТЖМ Риддерде сезілген жер сілкінісіне қатысты пікір білдірді

Бүгін Риддер тұрғындары 2 балдық жер сілкінісін сезді. Төтенше жағдайлар министрлігі зардап шеккен азаматтар мен қираулар туралы ақпарат келіп түспегенін айтты, деп хабарлайды ТЖМ Telegram-дағы ресми арнасында.

ТЖМ "Сейсмологиялық бақылаулар мен зерттеулердің ұлттық ғылыми орталығы" ЖШС сейсмикалық станциялар желісі ақпанның 10-ы сағат 14:24-те жер сілкінісін тіркеді.

Жер сілкінісінің ошағы Алматыдан шығысқа қарай 1023 километр жерде Ресей аумағында (Алтай Республикасы, таулы жер, Қазақстан шекарасынан 30 километр жерде) орналасқан.

Ведомство ақпараты бойынша, жер сілкінісі MSK-64 шкаласы бойынша Риддерде 2 балға жеткен. Қазіргі таңда жағдай тұрақты.

Зардап шеккендер мен қираулар туралы ақпарат келіп түскен жоқ.

"ТЖМ бөлімшелері жергілікті атқарушы органдармен бірлесіп коммуналдық және гидротехникалық құрылыстардың жай-күйіне тексеру жүргізіп жатыр. ТЖМ азаматтарға сабырлы болып, дүрбелеңге түспеуді сұрайды", – делінген хабарламада.