Павлодар облысында прокурор атын жамылып, ақша бопсалаған күдікті ұсталды

Әлеуметтік желілерде Павлодар облысы прокуратурасының қызметкері ақша қорқытып алғаны туралы ақпарат тарап жатыр. Осы жайтқа облыстық прокуратура пікір білдірді, деп хабарлайды KAZ.NUR.KZ.

Павлодар облысы прокуратурасының ресми сайтында жарияланған ақпарат бойынша, 2024 жылғы 9 ақпанда облыс прокуратурасының ішкі қауіпсіздік қызметіне қала тұрғыны прокуратура қызметкерінің әрекетіне шағыммен жүгінген.

"2024 жылғы 10 ақпанда облыстық полиция департаменті Қылмыстық кодекстің 194-бабы (қорқытып алу) бойынша сотқа дейінгі тергеуді бастады.  

Сол күні күдікті ұсталып, ол жасаған қылмыстық құқықбұзушылық үшін кінәсін мойындады.

Ұсталған адамның прокуратураға еш қатысы жоқ", - делінген хабарламада.

Қадағалаушы орган қазір қылмыстық тергеу жүріп жатқанын, тергеу мүддесі үшін өзге мәліметтер жария етілмейтінін мәлімдеді.