Екібастұз МАЭС-2-тегі жымқыру: прокуратура миллиард теңгеге жуық шығынды анықтады

Екібастұз МАЭС-2-тегі жаңғырту жұмыстарында 1 миллиард теңгеге жуық қаражат ысырап болған. Бұл туралы Павлодар облысының прокуратурасына сілтеме жасаған KAZ.NUR.KZ хабарлайды.

"Павлодар облысының прокуратурасы "Екібастұз МАЭС-2" АҚ-ны тексеру барысында 3-ші энергоблокты орнатумен жылу электр станциясын кеңейтуге және реконструкциялауға арналған қаражатты ысырап ету фактілерін анықтады. Расталмаған жұмыстардың көлемі - шамамен 1 млрд теңге", - делінген хабарда.

Прокурорлардың мәліметінше, Қылмыстық кодекстің 189-бабы (аса ірі мөлшерде мүлікті жымқыру) бойынша сотқа дейінгі тергеп-тексеру шеңберінде қылмыстың барлық мән-жайын, залалдың түпкілікті сомасын және оған қатысы бар адамдар тобын анықтауға бағытталған тергеу шаралары жүргізіліп жатыр.

Айта кетейік, "Екібастұз МАЭС-2 станциясы"АҚ сайтындағы мәлімет бойынша, бұл – Қазақстан Республикасының аумағында орналасқан, белгіленген қуат мөлшері 1000 МВт, қазақстандық энергетикалық кәсіпорын.

Акционерлік қоғам қазақстандық энергетика нарығындағы екі ірі энергетичестикалық холдингтер: әрқайсына 50 пайыз акция тиесілі "Самрұрық-Қазына" АҚ және "Самұрық-Энерго" АҚ мүддесін білдіреді.

Екібастұз МАЭС-2 - Екібастұз қаласындағы жылу электр станциясы. Екібастұз МАЭС-2 алаңындағы құрылыс жұмыстары 1979 жылы басталды. Бірінші энергоблок 1990 жылы, 2-ші- 1993 жылы әрқайсы 500МВт қуаттылықпен іске қосылған.