Қазақстанда интернеттегі жарнамаға қатысты жаңа ережелер 2 наурызда күшіне енеді

Қазақстанда интернеттегі жарнамаға қатысты жаңа ережелер 2 наурызда күшіне енеді. Жаңа ереже туралы мәдениет және ақпарат министрі Аида Балаева түсіндірді, деп хабарлайды Қазақстанның Мәдениет және ақпарат министрлігінің сайтына сілтеме жасаған KAZ.NUR.KZ.

Онлайн-жарнаманы таңбалау ережелерін бекітетін бұйрық "Әділет" порталында жарияланған.

Ведомстводағылар былтыр 10 шілдеде мемлекет басшысы "Онлайн-платформалар және онлайн-жарнама туралы" заңға қол қойғанын еске салды. Заң жобасы Қазақстанда қауіпсіз онлайн орта құруға бағытталған. Құжаттағы көрсетілген негізгі құқықтық тетіктердің бірі - желідегі жарнаманы таңбалау міндеттемесі.

"Біз зерттеген халықаралық тәжірибе көрсеткендей, жетекші елдер онлайн-жарнаманың маңызды рөлін және оны онлайн-платформаларда көрсету тетіктеріне ерекше назар аударады. Сонымен қатар онлайн-жарнаманың ашықтығын арттыруға бағытталған талаптарды көздейді. Ережелердің бизнеске әсері оңтайлы бағаланды және толығымен Қазақстанның онлайн сегментінде кең таралуы қазіргі тәжірибе негізінде екенін атап өту қажет. Осы ережелерді қалыптастыру кезінде коммерциялық негізде орналастырылған контентті өз бетінше белгілейтін медиа-субъектілер тәжірибесіне сүйендік. Біз өз кезегімізде бұл үрдісті Қазақстан Республикасының бүкіл интернет кеңістігіне тарату жөн деп есептейміз. Ереже 2 наурыздан бастап күшіне енеді", - деп атап өтті министр.

Одан өзге осы ережеге сәйкес инфлюенсерлер (блогерлер) коммерциялық немесе шарттық негізде орналастыратын онлайн-жарнаманы таңбалауға тиіс.

Олар жарияланымның басында немесе соңында онлайн ортада белсенді қолданылатын мынадай тұжырымдардың бірін көрсету керек: "жарнама", "жарнамалық материал", "серіктестік материал", "демеушілік материал", "жарнама құқығында", "демеушімен төленген", "PR құқығында".

Әлеуметтік жарнаманы (қайырымдылық және коммерциялық емес сипаттағы басқа да қоғамдық пайдалы мақсаттарға қол жеткізуге бағытталған) және жедел хабар алмасу қызметтерінде (мессенджерлер) орналастырылатын жарнаманы арнайы белгілеудің қажеті жоқ.

Ережелер осы жылдың 2 наурызынан бастап күшіне енеді.