Зауытта ширек ғасыр жұмыс істеген ақтөбелік 17 млн теңге өтемақы алатын болды

Ақтөбе тұрғыны зауытта ширек ғасыр жұмыс істеген. Мұнда ол қатерлі ісікке шалдыққандықтан, моральдық шығын ретінде 17 миллион теңге өтемақы алады. Бұл туралы облыстық сотқа сілтеме жасаған KAZ.NUR.KZ хабарлайды.

Соттың ресми сайтында хабарланғандай, Ақтөбе қалалық сотында бұрынғы қызметкердің жұмыс берушіден моральдық шығын өндіру туралы талап арызы бойынша азаматтық іс қаралды.

Іс материалдарынан анықталғандай, талапкер зауытта 25 жылдан астам шикізат дайындау операторы болып жұмыс істеген. Кейінірек еңбек шарты бұзылған.

"Қызметкер зиян жағдайларда жұмыс істеген кезде ауруға шалдығып, толыққанды жұмыс істеу мүмкіндігінен айырылды", - деп түсіндірді соттағылар.

2021 жылы ер адамға қатерлі ісік диагнозы қойылған. Санкт-Петербургте жасалған ақылы ота нәтижесінде бір өкпесі алынып, екінші топтағы мүгедек деген диагноз қойылған.

"Қызметкердің кәсіптік ауруына жұмыс берушінің кінәсі 100 пайыз, еңбекке қабілетін жоғалтуы 89 пайыз", - деп атап өтті соттағылар.

"Ақтөбе қалалық сотының шешімімен жұмыс берушіден талапкердің пайдасына 17 миллион теңге моральдық шығын өндірілді", - делінген сот хабарламасында.

Сот шешімі әлі заңды күшіне енген жоқ.