Шымкент әкімінің экс-орынбасары ҰҚК қызметкеріне пара берді деп айыпталған соң сотқа өзі жүгінді

Бұған дейін Шымкент қаласы әкімінің орынбасары қызметін атқарған Мақсұт Исахов кәсіпкерлерді сотқа берді. Кәсіпкерлердің арызы негізінде ҰҚК қызметкерлері оған қатысты қылмыстық іс қозғаған болатын. Бұл туралы KAZ.NUR.KZ хабарлайды.

Талапкер ЖШС-лардың бірінің басшысы ҰҚК-ге жүгінген арызында шындыққа сәйкес келмейтін және оның ар-намысы мен абыройына нұқсан келтіретін мәліметтер бар екенін айтқан.

Осыған байланысты Мақсұт Исахов сотталушылардан келтірілген моральдық зиянды өтеу ретінде 2 миллион теңге талап етіп отыр.

Азаматтық істер жөніндегі сот істі қарап, талап-арызды қанағаттандыруға негіз таппай, талаптарды толығымен қанағаттандырудан бас тарту туралы ұйғарым шығарды.

Бұл әлі түпкілікті шешім емес, іс апелляциялық сотқа жіберілді.

Сондай-ақ онда 2023 жылдың маусым айында ЖШС басшылары Шымкент қалалық ҰҚКД-ге қала әкімдігінің, атап айтқанда, энергетика және инфрақұрылымды дамыту басқармасының жұмысында заңдылықтың сақталуын тексеру туралы өтінішпен жүгінгені айтылған.

Кәсіпкерлер конкурстар өткізуде және мемлекеттік тапсырыс бойынша қызметтерді сатуда заңбұзушылықтар болғанын айтқан.

Бұл арызды тексеру нәтижесінде ҰҚКД осы саланы басқарған Шымкент қаласының әкім орынбасарына қатысты қылмыстық іс қозғады. Оған ҚР Қылмыстық кодексінің 362-бабы, 4-бөлігі, 3-тармағы (Билікті немесе қызметтік өкілеттіктерді асыра пайдалану) бойынша айып тағылды.

Тергеушілердің айтуынша, бұл істі тергеу барысында шенеунік 200 мың доллар пара ұсынған. Осыдан кейін ол ұсталып, ҚР Қылмыстық кодексінің 367-бабы 3-бөлігі (Аса ірі мөлшерде пара беру) бойынша жаңа айып тағылды.

2023 жылдың қыркүйегінде прокуратура Шымкент қаласы депутатының әрекетінен заңбұзушылықты таппай, бірінші факт бойынша (Билігін асыра пайдалану) қылмыстық істі тоқтатты.

Алайда жыл басында Мақсұт Исаховқа "пара берді" деген айып тағылды.

Еске сала кетейік, Шымкент қаласы әкімінің орынбасарын өткен жылдың 20 шілдесінде ҰҚК қызметкерлері ұстаған болатын. Ол сыбайлас жемқорлық қылмысы бойынша күдікке ілінді.