Қазақстанда газ бағасы қаншаға көтеріледі: Энергетика министрі жауап берді

Энергетика министрлігінің алқа мәжілісінде өткен брифингте министр Алмасадам Сәтқалиевке Қазақстанда сұйытылған мұнай газының бағасы қашан және қаншаға қымбаттайтыны туралы сұрақ қойылды. Бұл туралы KAZ.NUR.KZ тілшісі хабарлайды.

"Жүйелі жұмыс туралы айтып отырмыз, біз жыл сайын сұйытылған мұнай газының бағасын көтеретін боламыз.

Биыл облысқа қарай 5-8 теңгеге аз ғана өсім жасамақпыз. Бұл биылғы жылдың көктемінде болады деп жоспарлап отырмыз", - деді Сәтқалиев.

Айта кетейік, бүгін өткен алқа мәжілісінде Энергетика министрлігінің басшысы Қазақстан сұйытылған мұнай газына ең төменгі бағалардың бірін - өңірлерге байланысты 54-86 теңге аралығында ұстап отырғанын айтты. Оның айтуынша, Ресей, Қырғызстан, Әзірбайжан және Тәжікстанда баға әлдеқайда жоғары.

Еске салайық, 2023 жылдың желтоқсан айының соңында Энергетика министрлігі сұйытылған мұнай газының шекті бөлшек сауда бағасын бекіткен болатын. Белгіленген бағалар 2024 жылдың 1 қаңтарынан бастап күшіне енді.

Мәтіннен қате тапсаңыз, бізге жазыңыз