Алматыда қаңтар оқиғасына қатысқан 7 адам сотталды

Алматыда сот жеті адамға қатысты үкім шығарды. Олар 2022 жылғы қаңтар оқиғасы кезінде билікті басып алуды насихаттады деп айыпталды, деп хабарлайды қалалық соттың баспасөз қызметіне сілтеме жасаған KAZ.NUR.KZ.

Алматының қылмыстық істер жөніндегі соты 7 сотталушыға қатысты істі қарады.

"Олар экстремистік топ құру және оның қызметіне қатысу, қару-жарақ, оқ-дәрілер мен жарылғыш заттарды сақтау арқылы (182-баптың 2-бөлігі, 179-баптың 2-бөлігі, 24-баптың 1-бөлігі, 272-баптың 1-бөлігі, 287-баптың 4-бөлігі ҚР ҚК) жаппай тәртіпсіздікке шақыру жолымен билікті басып алу мен ұстауды насихаттады деп айыпталды.

Сот сотталушылар А., К., Т., О., Н. және К. 2022 жылдың сәуірі мен қарашасы аралығында көптеген кездесуге қатысып, онда билікті күштеп басып алуға үгіт-насихат жүргізіп, жария түрде шақырып, жаппай тәртіпсіздіктер жасауды ұйымдастыру, сондай-ақ билік өкілдеріне қарулы қарсылық көрсету мәселелерін талқылағанын анықтады", - делінген хабарламада.

Прокурор жеті сотталушыны да кінәлі деп тануды сұрады. Мемлекеттік айыптаушының сұрауы бойынша, мынадай жаза тағайындау сұралған:

• И. 3 жыл 4 айға бас бостандығынан айыру;
• Т. мен А. – 15 жылға бас бостандығынан айыру;
• қалған төрт сотталушыға – 13 жылға бас бостандығынан айыру.

Сотталушылар тағылған айыппен келіспей, ақтауды сұрады.

"Сотталушылардың қылмыстық әрекеттері арнайы іс-шаралардың нәтижелері, куәгерлердің айғақтары, стенограмма арқылы дәлелденді. Сондай-ақ оларда көптеген қару-жарақ арсеналы, көп мөлшерде дайындалған тұтандырғыш қоспасы бар бөтелкелер, қару ретінде пайдалануға дайындалған арматура және басқа да құралдар табылды.

Сотқа дейінгі тергеу барысында сотталушы И. қатты өкінетінін, қалған сотталушыларға қатысты мойындау айғақтарын бергенін атап өткен жөн", - делінген баспасөз хабарламасында.

Қорытындысында барлық сотталушы кінәлі деп танылды. А., Т., К. 6 жылға бас бостандығынан айыру, К., Н., К. – 5 жылға бас бостандығынан айыру, И. - 3 жыл және 4 айға шартты түрде бас бостандығынан айыру түрінде жаза тағайындалды.

Сот сотталушылардың іс-әрекеттерінде экстремистік топ құру, басшылық ету және оған қатысу белгілерін таппағаны айтылады. Осыған байланысты олар осы қылмыстық бапта айыптау бөлігінде ақталып шықты. Сот үкімі заңды күшіне енген жоқ.