Макрон жас қазақстандық жұпты құттықтап, Тоқаевтың сыйы туралы айтты (видео)

Қазақстандық Санжар Тайжан Эйфель мұнарасының шолу алаңында ғашығына үйленуге ұсыныс жасады. Франция президенті Эмманюэль Макрон сол жерде болған, деп хабарлайды KAZ.NUR.KZ.

Қазақстандық қос ғашық өте ерекше "қонақты" видеоға түсіріп, тіпті онымен сөйлесіп үлгерген. Видео Instagram желісінде жарияланды.

"Сүйіктіме үйленуге ұсыныс жасадым. Ал бірнеше сағаттан кейін Франция президенті Э. Макрон бізді құттықтады", - деп хабарлады Санжар Тайжан өз жазбасында.

Кадрларға қарағанда, қазақстандық жұпқа Франция президентімен тілдесудің сәті түскен.

Әңгімеде қыз бен жігіт үйленетінін айтып, оларды Макрон құттықтаған. Сондай-ақ олардың қайдан келгенін сұрап, Қазақстан туралы естігенде бірден президент Тоқаев пен сыйға алған тазы тұқымды күшіктерін еске түсірген.

Видеоға пайдаланушылар көптеген пікір жазып жатыр. Олардың көпшілігі жастарды құттықтап, мұндай ерекше сәтке таңданып жатыр.

Еске сала кетейік, 2023 жылдың 1 қарашасында Франция президенті Эмманюэль Макрон Астанаға ресми сапармен келген еді, оны әуежайда премьер-министр Әлихан Смайылов күтіп алды. Осыдан кейін Франция басшысы Ақордаға келіп, Тоқаевпен кездесті.