Наурыз-сәуірдегі жауын-шашын: Астана әкімі су тасқынына дайындық қалай жүріп жатқанын айтты

Астанада су тасқынына дайындық жұмыстары басталып кетті: биыл қар былтырға қарағанда екі есе мол жауған. Бұл туралы қала әкімі Жеңіс Қасымбекке сілтеме жасаған KAZ.NUR.KZ.

Қалада су тасқынына дайындық жұмыстары басталып кеткенін Жеңіс Қасымбек Instagram-дағы парақшасында мәлімдеді.

Қала басшысының айтуынша, биыл қыста қар ерекше мол жауған. Мәселен, өткен жылдың осы кезеңінде 3 млн 800 мың текше метр қар шығарылса, биылғы қысқы маусымда 6 млн 200 мың текше метрден астам қар шығарылды.

"Қазгидромет" болжамы бойынша, наурыз бен сәуір айларында да жауын-шашын мол жауады. Жалпы, жыл басынан бері жауын-шашын мөлшері нормадан 2 есе көп болды. Осыған байланысты қалада су тасқынына қарсы іс-шаралар белсенді жүргізіліп жатыр", – дейді Жеңіс Қасымбек.

Әкім келтірген мәлімет бойынша, өткен жылдармен салыстырғанда су тасқыны қаупі бар учаскелердің саны 20-ға дейін азайды. Олар– Алматы ауданындағы 5 учаске, Байқоңырдағы 4 учаске, Нұрадағы 6 учаске, Сарыарқадағы 3 учаске, Есіл ауданындағы 2 учаске.

"Қазіргі уақытта шамамен 45 мың метр бойынан астам арық-науа желісі, 2 мыңға жуық бақылау және жаңбыр қабылдайтын құдық тазартылды, 8 мың метр бойына жуық коллектор жуылды.

Сонымен қатар "Нұра-Есіл" каналы мен "Майбалық" көлі арасында орналасқан каналды қардан тазарту жұмысы, нөсерлі кәріз жүйелеріне заңсыз кірме жолдарды анықтау және т.б. жүргізіліп жатыр", – деді әкім.

Әкім осы жұмыстар жүргізіліп жатқанын, азаматтық қорғау органдары, коммуналдық қызметтер және т.б. тұрақты дайындықта екенін, елді мекендер мен су тасқыны қаупі бар учаскелерге ерекше көңіл бөлінетінін атап өтті.