Шымкент МӨЗ жоспарлы алдын алу жұмыстары басталды: елде бензин тапшылығы болуы мүмкін бе

25 наурызда Шымкент мұнай өңдеу зауытында жоспарлы алдын алу жұмыстары басталды. Бұл туралы "Қазмұнайгаз" ұлттық компаниясының баспасөз қызметінен хабарлады, деп жазады KAZ.NUR.KZ.

Ұлттық компанияның Telegram арнасындағы ақпаратынша, бұл жұмыс кәсіпорынның технологиялық қондырғыларын одан әрі қауіпсіз пайдалануды қамтамасыз ету үшін өнеркәсіптік қауіпсіздік саласындағы азаматтық қорғау туралы заңды орындау мақсатында және Энергетика министрлігінің жоспарына сәйкес жүзеге асырылады.

"Зауытта жұмыс басталған уақытта ішкі нарыққа мұнай өнімдерін біркелкі тиеп, жөнелту үшін барлық өнім желісінің жеткілікті қоры жинақталды.

Бұл ретте Павлодар мұнай-химия және Атырау мұнай өңдеу зауыттары штаттық режимде отын өндіруді жалғастырады", - делінген хабарда.

Басшылық жұмылдырылған мердігер ұйымдармен жоспарлы алдын алу жұмыстары бойынша алғашқы жиын өткізген. Сондай-ақ жұмыс барысында қауіпсіздік техникасын қатаң сақтау және жұмыс процесін тиімді жоспарлау міндеттері қойылған.

Мәтіннен қате тапсаңыз, бізге жазыңыз