Ақтөбе облысында жүк пойызының бірнеше вагоны рельстен шығып кетті (видео)

Ақтөбе облысы Шалқар ауданы Қауылжыр стансасында жүк пойызының жеті вагоны рельстен шығып кетті. Қазіргі таңда қалпына келтіру жұмысы жүріп жатыр, деп хабарлайды Kazinform.

Агенттік мәліметінше, оқиға бүгін сағат 10:00 шамасында болған.

58 вагоны бар Ақтөбе-Шалқар бағытындағы жүк пойызының 7 вагоны рельстен шығып кеткен.

"ҚТЖ-Жүк тасымалы" ЖШС "Батыс" филиалының директоры Бөріхан Беркімбаевтың айтуынша, қазіргі уақытта арнайы комиссия құрылып, тексеру жұмыстарын жүргізіп жатыр.

"Нақты неден болғаны сол кезде анықталады. Қазір Алматы-Ақтөбе және Алматы-Орал жолаушылар пойызы тоқтап тұр. Шамамен 1-2 сағатта қалпына келтірілуі мүмкін", - деді ол.

Агенттік ақпараты бойынша жолаушылар пойызы әзірге Шалқар қаласында тоқтап тұр.