Әлдекімдер қазақстандықтарға ҰҚК қызметкерінің атынан қоңыраулар соғып жатыр: комитет мәлімдеме жасады

Ұлттық қауіпсіздік комитеті алаяқтық фактілерінің жиілеп кетуіне байланысты мәлімдеме жасады. Бұл жөнінде комитетке сілтеме жасаған KAZ.NUR.KZ хабарлайды.

Ведомствоның ресми сайтында жарияланған мәліметке сүйенсек, қазіргі уақытта өзін ҰҚК қызметкері ретінде таныстыратын телефон алаяқтары көбейіп кеткен. Қаскүнемдер қаржылық операциялар жасауға көмектесуді сұрайды. Алайда, шын мәнінде, комитеттің қоңырауларға еш қатысы жоқ, телефон соғушылар бір ғана мақсатты көздеп отыр – азаматтардың ақшасын заңсыз иемдену.

"ҰҚК қызметкерлерінің қызметтік міндеттерін орындау шеңберінде азаматтарға кредит ресімдеуді, ақша қаражатын аударуды және өзге де қаржы операцияларын жасауды ұсынуға өкілеттігі жоқ екенін хабарлаймыз", - делінген ресми хабарламада.

Күдік туғызатын телефон қоңыраулары мен хабарламалар келіп түскен кезде полиция органдарына жүгіну ұсынылады.