2500 үйді су басып, адамдар пойызбен эвакуацияланды: Құлсары қаласындағы қазіргі жағдай қалай (видео)

Төтенше жағдайлар министрлігі Атырау облысын Құлсары қаласындағы қазіргі жағдай бойынша мәлімет берді. Жем өзеніндегі су деңгейінің көтерілуіне байланысты қаланы су басқан, деп хабарлайды ведомствоға сілтеме жасаған KAZ.NUR.KZ.

"Сағат 22.45-тегі жағдай бойынша алдын ала ақпаратқа сәйкес 2500-ге жуық жеке тұрғын үй мен әкімшілік ғимаратты су басты.

ЖАО, ТЖД, ПД, ҚМ, Ұлттық ұлан күштері халықты эвакуациялауды жалғастыруда. Осы сағатта 4 мыңнан астам адам , оның ішінде 1 мыңнан астам бала эвакуацияланды", - делінген ТЖМ хабарламасында.

ТЖМ бүған дейінгі берген ақпаратында халықты Құлсары қаласынан Атырау қаласына жолаушылар пойыздарымен эвакуациялау жүргізіліп жатқанын мәлім етті.

Құлсары қаласында халықты қабылдайтын 7 пункт дайындалды. Қазіргі уақытта 2 мыңнан астам адам, оның ішінде 400-ден астам бала орналастырылды.

Жем өзенінің атырауында су ағынын өткізу қабілетін арттыру үшін мұз жару  жұмыстары, сондай-ақ жағалауды нығайту жұмыстары жүргізілуде. Құлсары қаласында 45452 қапшық, 174 000 тонна инертті материал төселген.

"Халыққа көмек көрсету бойынша жұмыстар жүргізілуде, 4 мыңға жуық волонтер, оның ішінде Маңғыстау облысының Бейнеу ауылынан 100 адам тартылды.

Авариялық-құтқару жұмыстарына ТЖД, ЖАО, ПД 347 адам, 148 бірлік техника, 3 жүзу құралы, әскери қызметшілер, 4640 адам волонтер мен жергілікті тұрғындар жұмылдырылды", - делінген хабарламада. 

Сонымен қатар Атырау қаласынан қосымша күштер мен құралдар тартылды.

Жем өзенінде су деңгейінің көтерілуіне байланысты Жылыой ауданының "Доссор-Құлсары-Ақта"» республикалық маңызы бар автожолының 103-104 км су жүрді. Доссор кенті – Құлсары қаласының учаскелері автокөліктің барлық түрі үшін жабық. Кезекшілік ұйымдастырылып, ескерту белгілері орнатылды.

Жылыой ауданында жергілікті ауқымдағы табиғи сипаттағы ТЖ режимі жарияланды.