Швециядан Қазақстанға есірткі салынған сәлемдеме жеткізілген

Астанада "Қазпошта" қызметкерлері ішінде жарты килограмға жуық гашиш бар Швециядан келген сәлемдемені анықтады. Тәртіп сақшылары тексеру жұмыстарын бастады, деп хабарлайды Қаржылық мониторинг агенттігіне сілтеме жасаған KAZ.NUR.KZ.

Ведомствоның Telegram-дағы ресми арнасында жарияланған ақпаратқа сүйенсек, Бас көлік прокуратурасының үйлестіруімен Қаржылық мониторинг агентігі Қылмыстық кодекстің 286-бабының 4-бөлігімен Қазақстан Республикасының шекарасы арқылы есірткі заттарын заңсыз өткізу фактісі бойынша сотқа дейінгі тергеп-тексеру амалдарын бастады.

"Қызметкерлердің халықаралық пошта жөнелтілімдерін бақылау учаскесінде Қаржылық мониторинг агенттігінің Астана қаласы бойынша департаменті "Қазпошта" АҚ-ның Қауіпсіздік департаментімен бірлесіп, Швециядан келген салмағы 479,94 г болатын "гашиш" есірткі заты бар қорапты анықтады", - делінген хабарламада.

Агенттік өкілдерінің мәлімдеуінше, күдікті уақытша ұстау изоляторына қамалды.