Қазақстан жаз соңына дейін қант экспортына тыйым салады

6 мамырда вице-премьер Серік Жұманғариннің төрағалығымен өткен cыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның отырысында қант қызылшасының жаңа өнімі жиналғанға дейін ішкі нарықты қантпен қамтамасыз ету мәселелері қаралды. Бұл туралы премьер-министрдің ресми сайтына сілтеме жасаған KAZ.NUR.KZ хабарлайды.

Үкімет басшысының ресми сайтындағы ақпаратқа сүйенсек, қазiргi уақытта қоймалардағы қант қорының және Қазақстанға импорт көлемiнiң теңгерiмi шамамен 256 мың тонна. Бұл - елдiң жылдық қажеттiлiгiнiң жартысы (500-550 мың тонна).

"Бүгінде қоймалардағы қант пен шикі құрақ қоры 136 мың тонна. 2024 жылдың 31 тамызына дейін квотамен ресейлік қанттың 120 мың тонна көлеміндегі импортын қосқанда, бұл шамамен 256 мың тоннаға дейін жетеді. Сонымен қатар Қазақстанда 2024 жылдың соңына дейін өңдеуге арналған 300 мың тонна шикі құрақты бажсыз әкелуге квота бар. Орта есеппен айлық тұтыну жазда 46 мың тонна, сұраныс 60 мың тоннаға жетеді. Қолданыстағы қант қоры жаңа өнімге дейін қантқа деген сұранысты өтеуге жеткілікті", - деді ауыл шаруашылығы вице-министрі Ербол Тасжүреков.

Жақын арада қазақстандық тарап ресейлік әріптестерімен қант жеткізу квотасын жыл соңына дейін тағы да 100 мың тоннаға ұлғайту бойынша келіссөз жүргізуді жоспарлап отыр.

Сонымен қатар қазақстандықтарды қантпен үздіксіз қамтамасыз ету үшін ведомствоаралық комиссиямен 31 тамызға дейін Қазақстаннан үшінші елдерге, оның ішінде халықаралық транзитті қоспағанда, ЕАЭО-ға қатысушы елдерге қант экспортына уақытша тыйым салуды енгізу туралы ұжымдық шешім қабылданды.