Атырауда сауда орталығындағы ойын алаңында 10 жасар қыз биіктен құлап, жарақат алды

Атырауда сауда орталығындағы ойын алаңында 10 жасар қыз биіктен құлап, жарақат алды, деп хабарлайды ҚазАқпарат.

Оқиға, 9 мамыр күні кешке Атырау қаласында орналасқан сауда орталығында болған. Ойын алаңындағы қорғаныш белдігі үзіліп, жасөспірім биіктен құлаған. Соған байланысты ата-анасы оқиға орнына жедел жәрдем бригадасын шақырған.

"Жедел жәрдем бригадасының дәрігерлері жасөспірімге алғашқы медициналық көмек көрсетіп, облыстық балалар ауруханасына жеткізді. Аурухана дәрігерлері 10 жасар қыздың сол жақ шынтақ буынының жабық жарақаты барын анықтады.

Мұндай жарақат оң жамбасында да болған. Дәрігерлердің тексеруінен соң стационарлық емдеу шарасы қажеттігі туындамады. Сол себептІ жарақат алған жасөспірім амбулаторлық ем алу үшін үйіне жіберілді", -деп хабарлады облыстық денсаулық сақтау басқармасының баспасөз қызметі.