Қазақстандағы әскери мектептерде бірқатар заңбұзушылық анықталды

Бас әскери прокуратура Алматы, Қарағанды және Шымкент қалаларында "Жас Ұлан" әскери орта білім беру мекемелерінің қызметін ұйымдастыруына тексеру жүргізді. Тексеру қорытындысы бойынша бірқатар заңбұзушылық анықталды, деп хабарлайды KAZ.NUR.KZ ведомствоға сілтеме жасап.

Алматы, Қарағанды және Шымкент қалаларында "Жас Ұлан" әскери орта білім беру мекемелерін 908 кәмелетке толмаған тыңдаушылар оқиды.

Оқу-материалдық процестің білім беру қызметтерінің қауіпсіздігі мен сапасы, өртке қарсы және санитарлық нормалар мен ережелерді сақтау мәселелері зерделенді.

"Тексеру нәтижелері бірқатар бұзушылықты ашты. Балалардың қауіпсіздігін сақтамау, өртке қарсы және санитарлық нормалар мен ережелердің бұзылуы, мектептерді материалдық-техникалық жарақтандырудың жеткіліксіздігі және басқа бұзушылықтар анықталды.

Балаларды мектеп автобусымен тасымалдауды жүргізуші куәлігінің тиісті санаты жоқ адам жүзеге асырған.

Мектептерді жарақтандыру тиісті нормаларға сәйкес келмейді (жиһаз, кереуеттер, тұғырлар, парталар, орындықтар), мектептерде спорттық құрал-саймандар (төсеніштер, спорттық тренажерлер, футбол, волейбол доптары) жоқ", - делінген хабарламада.

Ведомство мәліметінше, мектеп ғимараттары күрделі жөндеуді қажет етеді, онда тыңдаушыларды оқыту барысында олардың өмірі мен денсаулығына қауіп төндіреді.

Көрсетілген барлық факт бойынша Қорғаныс министрлігіне заң бұзушылықтарды жою туралы ұсыну енгізілді.

Прокурорлық қадағалау актісін қарау нәтижелері бойынша мектептерді жөндеуге қаражат бөлінді, заң бұзушылықтарды жою жоспары әзірленді, 14 жауапты лауазымды тұлға тәртіптік жауапкершілікке тартылды.