Қалпына келтіру мүмкін емес: СҚО-да су тасқынынан бес жүзден астам үй толығымен қираған

Солтүстік Қазақстан облысында арнайы топтар су тасқыны кезінде бүлінген тұрғын үйлерді бағалау және техникалық тексеру жұмыстарын жүргізіп жатыр. Бұл туралы Петропавловск.news хабарлайды.

Осы уақытқа дейін мамандар Солтүстік Қазақстан облысындағы 3898 үйдің 3363-ін тексерді. Мамандар әзірге 508 үйді қалпына келтіру мүмкін емес екенін анықтаған.

Басылым мәліметінше, мердігер ұйымдардың қызметкерлері үйді жөндеуге 845 сметалық құжат әзірлеген. Апта соңына дейін зардап шеккен үйлерді техникалық тексерістен өткізуге құжат беру аяқталады.

Сондай-ақ облыста су тасқынынан үйі толығымен қирағандарға баспана салу жұмыстары басталып та кетті. "Солнечный" шағын ауданында 500 үйдің құрылысы басталды.

Қазақстанның солтүстігінде 6 мың отбасы 100 АЕК көлемінде бір реттік жәрдемақы алды. Облыс бойынша төлемдердің жалпы сомасы 2,2 млрд теңге болды.

Петропавлда су тасқынынан зардап шеккен үйлерді жөндеу жұмыстарын жергілікті ауылдардан келген топ жүргізіп жатыр, деп хабарлады КТК телеарнасы.

Қазір қалпына келтіруге жарамды деп танылған үйлер мен пәтерлерде судан бүлінген дүниелердің бәрі жаппай бөлшектеліп жатыр. Зардап шеккендер мемлекеттен бөлінген ақшаға мүлкін кім жөндейтінін таңдауға мүмкіндігі бар. Қаладағы ең сенімдісі облыс орталығына ауылдардан келген арнайы механикаландырылған бригадалар болып саналады. Оларда 700-ге жуық құрылысшы, электрші және әрлеуші жұмыс істейді.