Су тасқынынан зардап шеккен өңірлердегі оқушылар жазда қалай оқиды

Су тасқыны салдарынан қашықтан білім алған оқушылар үшін "Жазғы мектеп" жұмыс істейтін болады. Оқу-ағарту министрлігі өкілі сабақтар қашан басталатыны және қалай өтетіні туралы айтты, деп хабарлайды KAZ.NUR.KZ ведомствоның баспасөз қызметіне сілтеме жасап.

"Құрметті, әріптестер, оқушылар, ата-аналар. Білім алушылар үшін 9-11 сыныптарды қоспағанда орта білім беру ұйымдарында білім сапасындағы жетіспеушіліктердің орнын толтыру мақсатында "Жазғы мектептер" ұйымдастыру қалыпты үдеріс. Су тасқынынан зардап шеккен төтенше жағдй жарияланған өңірлерде оқу процесі қашықтан өткізілді", - деді Оқу-ағарту министрлігі орта білім комитетінің төрағасы Қаныбек Жұмашев.

Оның сөзінше, Солтүстік, Шығыс облыстарда қыстың кезіндегі қатты аязда сабақтар қашықтан ұйымдастырылды

"Осындай жағдайда министрлік білім алушылардың қажеттілігі мен сұранысына қарай, ата-аналардың келісімімен жазғы мектептерді ұйымдастыруды ұсынады. Биыл жазғы мектеп 27 мамыр мен 31 мамыр аралығында 2-3-4-5-7-8-10 сынып оқушылар үшін өз жұмысын бастауға дайын. Жазғы мектепте білім алушылардың оқу жетістіктері бағаланбайды. Үй тапсырмасы берілмейді. Климаттық жағдайларды ескере отырып, бастауыш сыныпта сабақтар 30 минуттан, 5-10 сынып аралығында 40 минуттан өткізіледі. Жазғы уақыттағы оқу қызықты, мазмұнды өтуі үшін барлық жағдай жасалуға тиіс", - дейді Қаныбек Жұмашев.

Комитет төрағасы биыл Оқу -ағарту министрлігі ата-аналарға таңдау мүмкіндігін беріп отырғанын атап өтті.