Вице-министр құлдыққа қандай адамдар жиі түсетінін айтты

Былтыр Қазақстанда адам сату қылмыстары категориясы бойынша 93 қылмыс тіркелді. Бұл туралы мәжіліс кулуарында ішкі істер вице-министрі Марат Қожаев мәлімдеді, деп хабарлайды KAZ.NUR.KZ тілшісі.

Ішкі істер вице-министрі Марат Қожаевтың айтуынша, құлдыққа материалдық жағдайы нашар, туыстарымен қарым-қатынасы ушығып кеткендер түседі.

"Былтыр адам саудасы бойынша 93 қылмыстық іс тіркелді. Оның 67-сі жыныстық қанау притондарын ұйымдастыру бойынша. 7 адам сату фактісі анықталған. Мұндай жағдайға ұшырайтын адамдардың негізінен материалдық жағдайы нашар болады. Туыстарымен қарым-қатынасы нашар, әлеуметтік жағдайы ушығып тұрғандар мен біздің елімізде заңсыз жүрген мигранттар. Әсіресе, қыздарды шетел азаматына сатып жіберу бойынша жауапкершілікке тарттық", - деді ол.

Вице-министр сондай-ақ жезекшөлікпен болатын қылмыстар көбіне мегаполистерде жиі тіркелетінін айтты.

"Қай өңірде адам саудасы көбірек екенін айту қиын. Жаңа айтқанымдай, адам саудасының ішінде жиі кездесетіні жыныстық саудаға салу, ал бұл мегаполистерде көп", - деді Қожаев.

Сондай-ақ ол жаңа қабылданған заң жобасында мұндай қылмыстарға қатысты қылмыстық жауапкершілік өзгермейтінін айтты. Оның сөзінше, адам саудасы үшін қылмыстық жауапкершілік қатаң.

"Мұндай қылмыс жасағандарға жаза онсыз да қатал. 18 жасқа толмағандар зардап шеккен адам саудасына қатысты істе 18 жылға дейін бас бостандығынан айыру жазасы бар", - деді вице-министр.