Алматылықтарға жіберілген хабарламалар неліктен "президенттік" деп аталған: әкімдік өкілдері түсіндірді

Алматы әкімдігінің өкілдері хабарлама атауы халықаралық стандарттарға байланысты екенін және оны ешкім өзгертуге болмайтынын айтты. Бұл туралы KAZ.NUR.KZ хабарлайды.

Бүгін Android ОЖ базасындағы телефондарды пайдаланатын Алматы тұрғындары "президенттік құлақтандыру" алды.

Алматыда мемлекет басшысының тапсырмасы бойынша Mass Alert – төтенше жағдайды жедел хабарлау жүйесі сынақтан өткізілді.

"Уайымдамаңыз. Халықты хабардар ету жүйесіне тексеру жүргізілуде", - делінген үш тілдегі хабарламада.

Алматы әкімдігінің өкілдері ескерту неліктен "президенттік" деп аталғанын түсіндірді.

"Құлақтандыру жүйесін тексеру туралы хабарламалар "Президенттік құлақтандыру" немесе "Ұлттық құлақтандыру" белгісімен келді. Бұл 3GPP TS 23.041 халықаралық спецификациясы Cell Broadcast арнасының тақырып атауларын стандарттаумен байланысты.

Осы спецификацияға сәйкес барлық телефон аппараттын өндірушілер өздерінің мобильді құрылғысында осы атауларды операциялық жүйе деңгейінде іске асырады", - деп хабарлады ведомство өкілдері.

Сондай-ақ әкімдік қазіргі уақытта Қазақстан Республикасы үшін өндірушілерге "Ұлттық құлақтандыру" деген тақырыппен жазу талаптары әзірленіп жатқанын атап өтті.

Мәтіннен қате тапсаңыз, бізге жазыңыз