Жетісуда күкірт қышқылының ағып кетуі: төтенше жағдай орнында зардаптарды жою жұмыстары жалғасуда

ТЖМ Жетісу аймағындағы күкірт қышқылының ағып кетуіне қатысты жағдай туралы айтты: оқиға орнында газсыздандыру шаралары жүргізіліп жатыр. Бұл туралы ведомствоның Telegram-арнасына сілтеме жасаған KAZ.NUR.KZ хабарлайды.

Жетісу облысы Кербұлақ ауданында 46 адам, оның ішінде 18 бала бар 10 жеке тұрғын үйдің тұрғындары үйлеріне оралды.

Вагон-цистерна Малайсары вокзалынан қауіпсіз жерге – 1 шақырым қашықтыққа сүйретілді.

Сондай-ақ ТЖМ ақпаратына сай, СЭБД (санитарлық-эпидемиологиялық бақылау департаменті) қызметкерлері топырақ пен ауаға зертханалық зерттеулер жүргізіп, сынамалардың қалыпты шектерде екенін анықтады.

Кербұлақ ауданының РХЗ қорғау қызметі жергілікті атқарушы органдармен бірлесіп залалсыздандыру шараларын жүргізуде.

Естеріңізге сала кетейік, Жетісу өңірінде вагон цистернасынан апаттық клапаннан күкірт қышқылының ағуы анықталған болатын. Құтқарушылар тұрғындарды эвакуациялады.

Сондай-ақ жақында Ақмола облысында тұз қышқылының ағуы болғанын айта кеткен жөн. 27 мамырда жүк тасымалдаушылар цистернаның ішіндегісін алып жатқанда, тұз қышқылының қайта-қайта ағуы орын алған. Ағып кетуді Астана ТЖД қызметкерлері жойды.