Ақтөбелік зейнеткер SIM картасының мерзімін "ұзартқаны" үшін 2 миллион теңге төлеген

Ақтөбе тұрғыны алаяқтардың қоңырауына жауап беріп, 2 миллион теңгеге жуық ақшасынан айырылды. Олар зейнеткерді SIM картасының әрекет ету мерзімін ұзарту керек деп алдаған. Бұл туралы Ақтөбе облысының полициясына сілтеме жасаған KAZ.NUR.KZ хабарлайды.

Ақтөбе облыстық полиция департаментінің баспасөз қызметі телефон алаяқтары өздерін ұялы байланыс операторының қызметкері ретінде көрсете бастағанын хабарлады. Алаяқтар SIM-карта мерзімін ұзартуды ұсынып, SMS кодты жазуды сұрайды.

Алаяқтар азаматтарға қоңырау шалып, өздерін байланыс компаниясының қызметкерлері ретінде таныстырады. Олар телефон нөмірінің мерзімі аяқталғанын мәлімдейді және қызмет көрсетуді ұзартуды ұсынады. Жаңартуға келіскен кезде, алаяқтар SMS-пен немесе кез келген қосымша арқылы келген кодты айтуды сұрайды. Осындай қоңыраудың кесірінен ақтөбелік тұрғын 2 миллион теңгеден астам шығынға батқан.

"​Ақтөбе қаласының 63 жастағы тұрғыны осындай алаяқтықтың құрбаны болды. Зейнеткер қоңырау шалушыларға сеніп, салдарынан алаяқтар оған 500 мың теңгеге несие ресімдеп, шотынан 3400 АҚШ долларын шешіп алған", - делінген хабарламада.

Сізге немесе жақындарыңызға ұялы байланыс операторының қызметкері ретінде қоңырау шалып, ұялы нөмірдің мерзімі аяқталатынын айтса, сақ болыңыз – бұл алаяқтар, деп ескертеді полиция. Қоңырау шалу кезінде телефоныңызға келген кодты айтуды ұсынуы мүмкін. Мұндай жағдайда ешқандай ақпарат бермей, сөйлесуден бас тартыңыз.

Полицейлер алдаудың тағы бір түрі шыққанын ескертті.

"Телефон алаяқтары азаматтарды олардың достары немесе туыстары ретінде алдайды, ол үшін жалған телефон нөмірлерін, арнайы бағдарламалар пайдаланады.

Мысалы, ақтөбелік әйелдің телефонына "әпкесі" WhatsApp арқылы хат жазып, таңға дейін 500 мың теңге қарыз беруін сұраған. Ештеңеден күдіктенген жәбірленуші қажет соманы аударған. Ал таңертең әйелдің алаяқтарға ақша аударғаны белгілі болды", - дейді полиция өкілдері.

Мұндай жағдайда полиция жақын адамдарыңызға видеомен қоңырау шалып, қарызға ақша сұрап тұрған адам шын мәнінде танысыңыз екеніне көз жеткізіп алуға кеңес береді.