Астанада көпір арқылы өтетін көлік қозғалысы 1 шілдеге дейін жабылады

Елорда тұрғындары мен қонақтарына жол жабылатыны ескертілді: Қараөткел көпіріндегі көлік қозғалысы 1 шілдеге дейін шектеледі. Бұл туралы Астана әкімдігіне сілтеме жасаған KAZ.NUR.KZ хабарлайды.

"Астана қаласының Көлік және жол-көлік инфрақұрылымын дамыту басқармасы" ММ 5 маусым сағат 21:00-ден 1 шілде сағат 06:00-ге дейін Қабанбай батыр даңғылы мен А.Бараев көшесі жағынан Қараөткел көпірін жартылай жауып, орташа жөндеу жұмысын жүргізуді жоспарлап отырғанын хабарлайды", - делінген әкімдік хабарламасында.

Бұл ретте жоғарыда көрсетілген учаскедегі қозғалыс екі бағытта да бір жолақ бойынша іске асырылады.

Бұдан бөлек, 4-5 маусым аралығында Қабанбай батыр даңғылы мен Бұқар жырау көшесінің қиылысындағы жол бөлігін орташа жөндеу жұмыстарын жүргізу жоспарланған.

Бұл аумақта көлік қозғалысы толығымен жабылады.

"Елорда тұрғындары мен қонақтарынан қала жолдарындағы кептелістерді болдырмау мақсатында бағдарды алдын ала жоспарлауды сұраймыз. Уақытша қолайсыздықтар үшін кешірім сұраймыз және жол-құрылыс жұмыстарын жүргізуге түсіністікпен қарауды сұраймыз", - дейді әкімдік өкілдері.

Мәтіннен қате тапсаңыз, бізге жазыңыз