Көкшетауда қоқыс тастауға шығып, хабарсыз кеткен студент қыз табылды

Полицейлер мен еріктілер 1 маусымнан бері іздестіріп жатқан көкшетаулық 16 жастағы колледж студенті жатақханаға оралды. Бұл туралы KAZ.NUR.KZ Ақмола облысы полиция департаментіне сілтеме жасап хабарлайды.

Ведомствоның баспасөз қызметінің мәліметінше, жоғалған қыз кеше, 4 маусымда кешкі сағат 22:30 шамасында жатақханаға оралған. Қазір полицейлер оқиғаның мән-жайды анықтап жатыр.

"Алдын ала болжам бойынша, қыз Астанада болған", - деп хабарлады Ақмола облысының полиция департаменті өкілдері.

Полицейлер кәмелетке толмағандардың түнгі уақытта ойын-сауық мекемелерінде немесе заңды өкілдерінің еріп жүруінсіз үйден тыс жерде болғаны үшін әкімшілік жауапкершілік қарастырылғанын еске салды.

"Қызға қатысты заңсыз әрекеттер жасалмағаны анықталды, алайда полиция бөлімшесі кәмелетке толмаған баланы күтіп-бағу және тәрбиелеу міндеттерін орындамағаны үшін заңды өкілге қатысты әкімшілік хаттама толтырды", - деп хабарлады ведомстводағылар.