Әкімдік Алматыда орташа айлық жалақы 454 мың теңгеге дейін өскенін мәлімдеді

Қала әкімдігі Алматыда жұмыссыздық деңгейі төмендеп, жаңа жұмыс орындары ашылып жатқанын мәлімдеді. Бұл туралы KAZ.NUR.KZ ведомствоның баспасөз қызметіне сілтеме жасап хабарлайды.

Қала экономикасы басқармасында алматылықтардың әл-ауқатын жақсарту бойынша қабылданып жатқан шаралар туралы айтылды.

Биыл сәуір айында жылдық инфляция наурыз айында 9,7 пайыздан 9,1 пайызға дейін баяулады. 2024 жылы жылдық инфляция одан әрі 7-8 пайызға дейін баяулайды деп болжанып отыр.

"Қалада тұрақты жұмыс орындарына баса назар аудара отырып, жаңа жұмыс орындары құрылуда. Жыл басынан бері 19,5 мың жұмыс орны құрылды (биылғы жоспар – 87 мың), оның 61 пайызы тұрақты. Бұл ретте қабылданып жатқан шаралардың арқасында жұмыссыздық деңгейі – биылғы жылдың бірінші тоқсанында 4,7 пайызға дейін төмендейді", - делінген хабарламада.

Әкімдік мәліметінше, биыл бірінші тоқсанда Алматыда орташа айлық жалақы 454 мың теңге (республика бойынша – 382 мың теңге). Номиналды мәнде жалақы 16,4 пайызға, нақты мәнде 6 пайызға өскен.