"Адамдарды ұрлап, мүлкін тартып алған": ІІМ мен ҰҚК арнайы операция жүргізді (видео)

Қызылорда қаласында ІІМ және ҰҚК өкілдері Бас прокуратураның үйлестіруімен аймақтағы криминогендік жағдайға кері әсер еткен қылмыстық топтың жетекшісі мен мүшелерін ұстау бойынша арнайы операция жүргізді. Бұл туралы KAZ.NUR.KZ Ішкі істер министрлігіне сілтеме жасап хабарлайды.

Ведомство өкілдерінің мәліметінше, күдіктілерге қатысты ұзақ мерзімді жедел іздестіру шаралары жүргізілген.

"Күдіктілердің қылмыстық әрекеттерін дәлелдеу криминалдық байланыстарының көп болғанынан қиынға соқты.

Топ мүшелері мақсатын іске асыру үшін адамдарды ұрлап әкетіп, мүлкін тартып алып, қылмыстық қақтығыстарға қатысқан", - дейді ІІМ ұйымдасқан қылмысқа қарсы күрес департаментінің өкілі Қуандық Алпыс.

ІІМ өкілдері қазіргі таңда барлық факт бойынша тексеру жүргізіліп жатқанын мәлімдеді.

"Сондай-ақ олардың ойын-сауық мекемелеріне қылмыстық қамқорлық көрсетуге, құрылыс және ауыл шаруашылығы саласында бопсалауларға қатысы бар-жоғы тексеріліп жатыр.

Топтың негізгі мүшелері қамауға алынды. Атыс және травматикалық қару, ірі мөлшерде қаражат тәркіленді. Тергеу Қылмыстық кодекстің бірнеше бабы бойынша жүргізіліп жатыр", - деп мәлімдеді Қуандық Алпыс.

Мәтіннен қате тапсаңыз, бізге жазыңыз