Найзағай мен жаңбыр: Алматы әуежайы рейстер кешігуі мүмкін екенін ескертті

Алматы халықаралық әуежайының өкілдері қаладағы қолайсыз ауа райына байланысты рейстер кешігуі мүмкін екенін ескертті. Бұл туралы KAZ.NUR.KZ тілшісі әуежайдың баспасөз қызметіне сілтеме жасап хабарлайды.

"Дауылдық ескертуге байланысты сағат 14:40-тан сағат 19:00-ге дейін қолайсыз ауа райы күтіледі: жел 15 м/с, көріну қашықтығы 2500 м, күн күркіреп, жаңбыр жауып, шаңды дауыл тұрады. Ұшу немесе қону туралы шешімді әуе компаниясының экипажы шығарады", - деп хабарлады Алматы әуежайының баспасөз қызметі NUR.KZ тілшісіне.

Air Astana өкілдерінің хабарына қарағанда, ауа райының қолайсыздығына байланысты Бангкоктан ұшып келген ұшақ бірден қона алмаған.

"КС 932 Бангкок-Алматы рейсін орындаған ұшақ Алматы әуежайына қонар кезде найзағай мен желдің күшеюіне байланысты қона алмай екінші айналым жасады. Ұшақ екінші әрекетте қонды", - деп хабарлады әуе компаниясының өкілдері.