ШЫҰ саммитіне байланысты астаналықтар қашықтан жұмыс істеуі мүмкін

Астанада 2024 жылғы 3-4 шілдеде Шанхай ынтымақтастық ұйымының саммиті өтеді. Соған байланысты кей астаналықтар қашықтан жұмыс істеу форматына ауыстырылуы мүмкін, деп хабарлайды KAZ.NUR.KZ әкімдікке сілтеме жасап.

"Астанада 2024 жылғы 3-4 шілдеде Шанхай Ынтымақтастық Ұйымының саммиті өтеді. Бұл күндері қауіпсіздік шаралары күшейтіледі.

Азаматтарға ыңғайлы болу мақсатында, әсіресе жолдарда кептеліс болмауы үшін 2-4 шілде аралығында мемлекеттік мекемелерге және квазимемлекеттік секторларға қызметкерлерінің 70 пайызына дейін қашықтан жұмыс істеу форматына ауыстыру ұсынылады", - делінген хабарламада.

Ведомстводағыдар 3-4 шілдеде мектепке дейінгі мекемелер жұмыс істемейтінін мәлімдеді.

"Бұл – ірі халықаралық іс-шараларды өткізу барысында күшейтілген қауіпсіздік шаралары қабылданатын және азаматтарға ыңғайлы болу үшін ішінара қашықтан жұмыс істеу тәртібі енгізілетін әлемдік тәжірибе", - деп хабарлады әкімдік өкілдері.