Синоптиктер елімізде 46 градусқа дейін ыстық болатынын ескертті

Синоптиктер Қазақстанда 25-27 маусым аралығында ауа райы қандай болатынын айтты. Олардың айтуынша, еліміздің басым бөлігінде қатты ыстық болады, деп хабарлайды KAZ.NUR.KZ "Қазгидромет" РМК ресми сайтына сілтеме жасап.

"Қазгидромет" РМК баспасөз қызметінің мәліметіне сүйенсек, алдағы үш күнде Иран аймақтарынан Қазақстан аумағына жылы ауа массалары келеді.

25-26 маусымда Қазақстанның батыс және солтүстік облыстарында жаңбыр жауады, кей аймақтарда қатты жаңбыр күтіледі. Ал 27 маусымда республиканың солтүстігінде күн ыстық болмақ.

Қазақстанның солтүстігінде күндіз ауа температурасы +35... +38 градусқа дейін көтерілсе, оңтүстігінде +40...+46 градусқа дейін жетіп, күн аптап болады деп күтіледі.

Еске салайық, бүгін синоптиктер алдағы 7 күнде, яғни 24-30 маусым аралығында Шымкентте қандай ауа райы күтілетінін хабарлаған болатын. Сондай-ақ Астана мен Алматыда алдағы аптада жаңбырлы ауа райы күтілетінін жазған едік.

Бұған дейін Астана, Алматы, Шымкентте және Қазақстанның басым бөлігінде қолайсыз ауа райына байланысты ескерту жарияланған болатын.