Қазақстандықтар неліктен баспана кезегінен шығарылып жатыр

Орталық коммуникациялар қызметінде өткен брифингте Құрылыс және тұрғын үй-коммуналдық шаруашылық істері комитетінің басшысы Бақытжан Жүнісбеков қазақстандықтар мемлекеттік қордан баспана алу кезегінен не себепті шығарылып жатқанын түсіндірді. Бұл туралы KAZ.NUR.KZ хабарлайды.

Бақытжан Жүнісбеков бүгінде Қазақстанда баспана кезегінде 650 мың адам тұрғанын, оның 440 мыңға жуығы халықтың әлеуметтік жағынан осал тобына жататынын айтты.

"Кезекті тазарту бойынша жұмыстар жүргізіліп жатыр. Өткен жылдан бері кезекте тұрған 400 мың адамның жағдайы сарапқа салынды, олардың 330 мыңы тізімге енгізілетін параметрлерге сәйкес келмейді деп танылды.

Қазіргі уақытта тексеру жүріп жатыр. Бірақ жыл басынан бері 40 мыңға жуық адамды кезектен шығардық. Кезек азайып келеді, біз бұл процесті цифрландырдық. Кезекте тұрғанын және сәйкестігін растау қажет екендігі туралы хабарлама SMS түрінде жіберіледі", - деді ол.

Айта кетейік, Шымкентте 1 тамыздан бастап тұрғын үй сертификатына өтінім қабылдау басталады.

Тұрғын үй сертификаты – мемлекеттік тұрғын үй бағдарламалары аясында несие негізінде "2-10-20 Бақытты отбасы", "5-10-20" бағыттарына сәйкес, тұрғын үйді сатып алу кезінде ипотекалық тұрғын үй қарыздары бойынша бастапқы жарнаның бір бөлігін жабу үшін азаматтарға берілетін көмек.